想不到昨日一聚，竟已是我們最後也是唯一的見面。
到小城上課遇上大賽車，為了避過雷鳴車聲，擁擠遊客，乃躲到這裏小隱。抵埗即往跑步，一條老嘢通山跑，身心舒暢。出完身汗，梳洗後往食葡國餐，然後滋滋油油，沙灘散步。遠處燈火燦爛，這邊月明星稀，抬頭見到十幾粒叮屎咁細粒嘅星星在雲間若隱若現，數吓數吓又到點幾。
一宿無話，轉過頭又到天明，游個早水精神好。酒店的園林泳池有浮花落葉，花叢有玉帶鳯蝶在食早餐，最奇妙的是遇上你。我在池中爬吓扒吓之際，身邊忽見有一小物（無不敬之意），看真，竟然是你。你瞪大對眼睇住我，我睥番轉頭，對峙一陣，你轉身起步，示範最正宗的蛙式。我終於明白原來你唔滿意我的蛙式有辱你的清譽，乃親自下場指導，我急急追隨，得益匪淺。到這一刻，陽光燦爛，世界美好，誰料到一小時後我便幾乎行先你一步？
與你暢泳後，在酒店的咖啡室（Café Panorama）早餐。九時多約十時，我正在座位上喝咖啡，突聞頭上有異響，抬頭一看，天花板正在塌下，我的即時反應是高舉手腳以保護頭部，同時盡量向外閃，數秒間，咖啡室數百呎範圍的天花板已完全塌下。在場的人不少均在驚呼“OMG”，我從下墜的天花板側閃出，幸無受傷。從天花板下爬出來後，我在想，上天真係好識玩人，在你最鬆弛、舒泰之際就突然整一嘢俾你歎，等你咁老定？
今天在泳池再見到你，見你兩眼無神，膚色黯啞，心知不妙，以水潑你幾吓，死翹翹冇反應，再撥，竟然反肚，確認死亡時間8:35。我遇上天花倒塌而絲毫無損，善泳如你卻水中亡，我不知道你死因為何，但肯定的是上天認定你夠鐘喇，是命也乎，是命也乎？我諗諗吓，此中有真意呀，於是決定上完堂快D回家與老妻撐枱腳，食餐安樂飯，打個電話俾老媽子，問吓佢隻腳重痛唔痛，同老豆報個平安。明天與阿仔阿女去歎咖啡，重有……重有好多嘢要做。蛙兄，與你的短暫邂逅是緣分，又似是啟示，多謝你了，拜拜。
阿里
