「哎呀！我地間屋冇咗喇。以前我地間屋唔係係水井旁邊囉，我老豆自己起架。我地係度住咗好多年喇，以前依度住咗好多人架，連門道兩邊都住哂人。呢，我就瞓果邊。「係嘞，係嘞，就係依度，果陣時冇依啲屏風，佢唔知係邊度搬過嚟。果陣我地自己間間房，我仲記得果次，果個後生仔，由香港過嚟，冇嘢做，撬我地度門，想偷嘢，俾我同家姐發現佢就走咗嘞。
「Ah！呢度，住呢度果個唔係阿……余……mud嘢呢？蒙太奇髮型屋個老板呢？啊！係余仲顯！你唔識佢？佢咪係蒙太奇髮屋老板個仔囉。後來做咗消防局長，仲成日上電視。佢就係住依度架嘞！「果邊，以前都係咁上下樣，不過我地唔會過去。點解？有鬼架！你都聽過lei。係呀，我地成日瞓瞓吓都聽到佢地嗌：『你咪搣我啦！』好鬼猛架。
「唉，真係拆咗我地間屋，依棵桑樹咪係我老豆種囉，咁大棵咯。以前仲有棵黃皮，好茂盛架，每次可以有成八九斤黃皮，後來俾我老豆斬咗，俾我阿媽足足鬧咗三日。
「咁就噤多年咯。我依加住係鵝頸橋。唔係嘞，影番張相先，依加得番個井，我以前就係係依果井打水架，影番張相俾個仔睇先。唔該，唔該。」
於鄭家大屋遇陳雪 2010.4.30
註1：澳門特別行政區政府文化局於鄭家大屋派發的小冊子中所記，根據原住客提供的照片證實院中的桑樹的確是後來種植的，非大屋原有樹木。註2：余仲顯為澳門消防局消防總長
更多照片
