你不知道的香港——米埔

只是大半小時的車程已置身在另一個世界，在這裏，沒有車聲市聲，烏烟醬氣，只有天光雲影水色鳥鳴，信步林間，看看鳥，吹吹風，享受冬日陽光，舒服過四手按摩，何況重唔使錢？細個時，聽過這個故事：「公冶長、公冶長，南山有隻虎拖羊，你食肉，我食腸。」唉，人就專係以己度人，將自己的機心夾硬加係雀仔身上。公冶長如真的懂鳥語，相信他必會如我現在這樣，享受與鳥同遊，冇你咁好氣。
經過長長的步道，走完揺揺晃晃的浮橋，終於穿越密茂的紅樹林，面對廣闊的后海灣。這裏名符其實是鳥的天堂，泥灘上，鸕鷀、蒼鷺、大中小白鷺、魚鷹、翠鳥、海鷗、黑臉琵鷺……，講得出名的與講唔出名的，多到數都數唔哂，我其實乜鳥都唔識，但齋看「鳥」生百態，也覺十分有趣。泥灘近處，見數隻黑翅長腳鷸在覓食，佢雀仔細細，對腳更幼過香雞，想來都應該唔會同蚌爭食，所以話盡信書不如無書。不過無論如何，現在有一點肯定真實無誤，那便是：我快樂鳥。