手機奇譚

前天用了剛過一年的電話離奇瓜柴，修理費貴過買新，迫於無奈換機，加入艾瘋行列。阿伯艾瘋初體驗，乜都唔識，晚上無法解鎖，指紋、密碼試勻都不得其門而入。無計可施之際，Siri突然現身，好有禮貌咁問：有乜嘢可以幫到你？大喜，告以情況，佢話：我唔係好明，你可唔可以講清楚啲？我再講佢都唔明，然後彈出一連串建議，你可以問：今日幾多號？邊個係李白？……見到一連串無厘頭問題，我不禁爆粗。點知熒幕上立即寫出我講的粗口字，然後斯文淡定咁話：大家係斯文人，唔使講粗口。我當堂俾佢吹脹，熄機！
事後，諗吓都係我唔啱，做乜要對佢講粗口？但係如果我開機道歉會點呢？佢會唔會原諒我？如果佢會我重驚！而且我難保我將來唔會再犯，有朝一日我唔覺意講粗口，佢突然話：你這星期已累講粗口十次，紅牌出場！或直接用電電我，咁咪大劑！智能電話實在好恐怖呀！