蒹葭

昨天上午在米埔，年輕朋友行過蘆葦濕地時話：好多禾呀，等我影下佢先。我多口告之這是蘆葦不是禾，雖然係禾本科。回程時，經過另一片蘆葦，冬日陽光下，蘆葦微微晃動，意態比上午更動人，幾名朋友大讚啲芒草好靚，齊齊舉機拍攝。我手機中恰好有幾天前在大棠拍的芒草照，於是與眾分享。年輕朋友大概沒有讀過「蒹葭蒼蒼，白露為霜，所謂伊人，在水一方」，不過如果有睇過水滸傳或水滸傳電影，見識過梁山英雄將小艇泊在蘆葦叢中突擊官兵，當會知道蘆葦生於濕地，芒草則長於山頭，二者不同。星期二心血來潮到大棠看楓葉，結果發覺夕陽斜照的芒草景致更有味道，一星期之內觀賞了兩種植物的美景，滿足。其實欣賞風景未必需要認識景物係乜，正如你行街睇女仔都唔使問佢叫乜名。香港人喜歡行山，大多如我般不求甚解，不過我有幸識得幾位熟悉鳥獸草木蟲魚的見多識廣朋友，時加指點，得以能知少少扮代表，也添加了不少郊遊的樂趣。